قاطع ولا تتخاذل

قاطع ولا تتخاذل

Monday, June 22, 2009

ليلة من ليالى الغرباء



دايما وانا قاعد فى الكافتريا فى وسط البلد .. وفى حالات معينه من التفكير .. والارهاق .. الاقى رزقى جالى لحد عندى ..
انا باسميهم رزقى .. لانى باتعلم منهم كتير اوى ..
ببساطه الاقى حد جالى وفتح معايه موضوع للنقاش .. الحد ده ممكن يبقى راجل كبير فى السن .. واد سريح من اللى بيسرحوا بولاعات او بمناديل .. واحد مجنون من المجانين اللى منطورين فى كل حته ( والللى باحس انى هابقى زيهم فى سن معين ) .. شاب جنتل ويعجبك .. من الاخر من كل لون يا باطستا ..
لما بنكون كتير ما باعرفش اتكلم معاهم .. لكن لما بابقى لوحدى باسحب كرسى واقعد معاهم .. واشوف رزقى ايه انهارده

المره دى كان واحد فى مشكله وبيسألنى المفروض يعمل ايه
طبعا بما انى محلل نفسى عبقرى .. ماقولتلوش حل .. سيبته يطلع حل من دماغه هو ..
فى الحالات الطبيعيه باقول شوية حلول من بعيد ..او بافتحله شوية سكك توديه لحلول ..وهو يختار اللى هو عاوزه .. لكن المره دى فعلا و رغم ان الموضوع قديم ومكرر .. الا انى فعلا ما كانش عندى حل

انا : واحد شاى سكر زياده يا معلم
القهوجى : تؤمر بحاجه تانيه
انا : تسلم ..
القهوجى : معاك واحد شاى سكر بره

الساعة دلوقتى الثانية عشر ونص .. ساعه كده ونقوم .. الناس ماليين الشوارع .. راجل ومراته ماشيين هناك .. عيل صغير بيجرى قدامهم ..وبعدين بيرجعلهم .. فرحااااااااان اوى ..
لما انت فرحان اوى كده بترجعلهم ليه .. ما تفضل تجرى ..
(بيرجعلهم عشان يطمن .. عشان يحس بالامان) .. انا كمان نفسى اطمن

ولد حاطط دراعه على كتف بنت .. وهى ماشيه جمبه وفرحانه ..
يا بنتى هايبيعك .. اول ما يلاقى واحده تانيه يحط ايده على .. كتفها ..
ما يتهياليش .. هو بيحبنى .. هو قالى كده .. وحتى لو .. انا جمبه مطمنه .. حاسه بالامان ..
امان ايه بس الله يقرفك .. ده انتى لسه ما كملتيش 16 سنه .. اومال لما يبقى عندك عشرين هايحط ايده فين
وقفوا عند بياع .. واقف ..دقنه طويله .. ماسك سيجاره .. وما بيندهش على البضاعه .. ماهو احنا فى اخر الليل .. وخلاص صوته راح .. بعد ما مشيوا من عنده .. فضل باصص عليهم .. لا بيضحك ولا بيعيط.. ولا بيحقد .. ولا اى حاجه .. شكله بيفكر .. نفسه يطمن ويحس الامان

اونكل شعنونه المنعكش ظهر .. فينك يا صديقى الصندوق دلوقتى .. دايما الراجل ده اشوفه انا وهو لما نيجى هنا .. ونبص عليه لحد ما يختفى .. وبعدها انا اتنهد .. وهو يقولى مستقبلك اهوه .. اضحك واقوله ابقى اعزمنى على شاى ما تسيبنيش كده ..

بقالنا كتير ما قعدناش مع بعض قعدات حرشه من بتاعة زمان .. احنا عجزنا بدرى كده ليه ..

هو انا شكلى كده طبيعى ولا فى حاجه ...
انا : مش واخد بالى تقصد ايه بالظبط
هو : يعنى انا شكلى مرتاح .. ولا قلقان
وبدون تفكير .. وبابتسامه خفيفه .. شكلك طالع عينك بصراحه
هو : هممممممممممممممممممم
( يلا يا معلم اسعى على رزقك )
انا : ممكن اقعد معاك ..شويه
هو : اتفضل
وبعد ما اتعرفنا .. وعرفت انه شاب قدى فى العمر تقريبا
قالى بصوت غريب .. عارف .. نفسى اطمن عليها اوى .. انا عارف انها فى مشكله .. ومش عارف المفروض اعمل ايه
طب ما تحاول تساعدها
مش عارف اساعدها ازاى .. او مش قادر .. ده غير انها مش عاوزانى اساعدها .. ثم انا كمان فى نفس المشكلة .. ومش عارف اخرج منها..
بص انا مش عاوز اعرف حاجه انت مش عاوزنى اعرفها ..او انا المفروض ما اعرفهاش .. بس ممكن تشرحلى عشان اقدر افهم واساعدك
بكل بساطه حبوا بعضون .. تركوا بعضون ..
والمشكله فى انهم حبوا ولا تركوا .. ولا بعضون
المشكله .. مش عارف .. بس اتنين زينا كان لازم يحبوا بعض ..وما كانش لازم يسيبوا بعضون خالص ..
طب وسيبتوا بعضون يجرى منكم ليه ..
عشان خانتنى
اوبس
مش خانتنى اوى كده .. بس هو معنى الخيانه بيختلف من واحد لواحد .. ممكن معنى الخيانه يبقى بالنسبه لواحد ان مراته تنام مع راجل غيره .. وبالنسبه لواحد تانى .. انها تعرف حد عليه .. وبالنسبه لواحد تالت .. انها مجرد تبص على راجل غيره ..
انا فاهمك كويس .. بس معلش .. ماهى بتمشى فى الشارع واكيد بتشوف رجاله كتير
فى فرق بين واحده شافت واحد ماشى فى الشارع .. وبين انها تبص عليه .. مش باقولك بتختلف من واحد لواحد

اها .. طب وانت عندك استعداد تسامح ..؟؟
لا .. مش هاعرف .. ولو سامحت مش هانسى .. ولو نسيت هاكرهها
طيب هى خانتك ليه .. ما بتحبكش ؟؟
مش عارف .. بص هى اكيد بتحبنى .. بس هى ساعات بتطلع منها حاجات مش بمزاجها ..
يعنى ايه مش بمزاجها ..حد اجبرها على كده ..
هى اجبرت نفسها على كده عشان تثبت لنفسها انى مش هانفع معاها ..
طيب وهى عاوزه تثبت لنفسها كده ليه ؟
مش عارف .. ولما سالتها قالت انها هى كمان مش عارفه
طب وانت عاوز ترجعلها ؟
صعب نكمل بعد اللى هى عملته
عاوز ولا مش عاوز
مش ده موضوعنا .. المشكله دلوقتى مش فى كده .. المشكله ان هى فى ازمه .. وانا الوحيد اللى كنت بساعدها فى الازمات .. مش عارف اساعدها ازاى
شوف مشكلتها ايه وحلهالها ..
عارف .. انا عمرى ما اديتلها حل واقعى لمشكله معينه .. وهى كمان .. دايما لما كان يبقى عندى مشكلة .. ما بتخترعش حلول عبقريه .. بس كان فى حاجه معينه بنديها لبعض .. بعدها الامور بتتحسن .. احنا بنرتاح .. بنطمن .. عارف ايه هى الحاجه دى
لا مش عارف
ولا انا .. بس اعتقد انه مجرد انى اسمع صوتها .. او هى تسمع صوتى .. مجرد اننا نحس اننا خايفين على بعض .. او مهتمين ببعض .. يمكن هو ده اللى كان بيخلينا نحس بالامان .. ونحاول نفكر فى ان لسه فى امل ..

تفتكر لو فى واحد جعان .. وحد قاله ما تخافش انا جمبك .. المشكله بالنسبه ليه كده اتحلت .,. اعتقد ان دى فلسفه غير منطقية
ممكن .. بس الاشياء المادية كنا بنحاول نشوفلها حلول .. لكن انا باتكلم على المشاكل النفسية

طب تفتكر لو روحت قولتلها انا نسيت كل حاجه .. وعاوز ارجعلك .. ده هيريحها
ممكن .. بس هايتعبنى انا .. لانى ماعنديش حاجه واحده تضمنلى انها ما تغلطش تانى .. هى نفسها قالتلى انها ما تضمنش انها تحصل تانى .. ده غير ان دى مش الغلطه الاولى

طب بصرف النظر عن الغلطه دى .. وعن الغلطات اللى قبل كده ..انت بتحبها ولا لا ؟؟
عارف .. انا اخدت قرار الانفصال ده من شهرين او اكتر .. وهى خدته من حوالى اسبوعين .. بس كل يوم قبل ما انام .. لازم افكر فيها .. كل ما احط نفسى فى مشهد مع واحده تانيه .. واحاول ابتسم .. عشان اقنع نفسى ان المشهد جميل .. دايما بتتحول الابتسامه لتنهيده طويله .. ويطلع صوت من جوايا يقولى .. لو كانت هى .. كان هايبقى المشهد اروع ..
عارف اخر مره شوفتها .. قولتلها انتى اخدتى اخر شوية حب موجودين جوايا .. ماكنتش فاهمها ساعتها بس فهمتها دلوقتى
..
طيب بالنسبه ليك انت ماغلطش فى حقها ولا مره .. ما خونتهاش .. ما عملتش حاجه هى قايالك مش عاوزاك تعملها ؟؟
ما افتكرش .. اكيد فى حاجات .. بس اللى اكيد برضو .. ان لو فى حاجه انا عارف انها خط احمر بالنسبة ليها .. يبقى اكيد انا ما قربتش منها
طيب بالنسبة ليها .. هل هى عندها استعداد تكمل .. بصرف النظر عن كل المشاكل اللى حصلت
مش عارف

انا ممكن اقول تحليلى للموقف .. بس قبل ما اقول اى حاجه .. تحب تضيف اى معلومه
بص انا لما ارتبط بالبنت دى .. قولتلها احنا هنخوض تجربة .. يا تفشل يا تنجح .. فى الاول كنت متاكد اننا هاننجح .. بعدين دخل الشك بينا .. شوية حاجات تافهه هى كانت بتعملها .. بس لما كنت باقول ده غلط .. كانت على طول بتقول حاضر .. انا عمرى ما شكيت فى اخلاقها الا بعد اخر مره .. انا شكى كان فى اهتمامها بالعلاقه
دى مش اول مره نقرر الانفصال .. حصل قبل كده مرتين .. وفى المرتين كنا بنقرر اننا نكمل فى نفس القاعده
ونوعد بعض اننا هانتغير .. لكن للاسف .. فى حاجات ما اتغيرتش .. رغم ان فى حاجات كتير اتغيرت

انا مش مشكلتى دلوقتى ارجعلها ولا لا .. مشكلتى هى ازاى اساعدها .. مش هاقولك عشانها هى ..وانا مش فارقه معايه .. انا فارق معايه اوى اللى هى فيه .. بيحرقنى .. بيوجعنى .. ومش كلام فارغ بتاع ناس فاضيه ..
انا دايما كنت باقولها .. انا مربوط فيكى بحبل من رقبتى .. كل ما ابعد عنك الحبل ده بيخنقنى .. اكتشفت دلوقتى انى روحى مربوطه بروحها ..

اولا يا باشا .. لازم اقولك ان دى مش ناهية العالم .. قصه بتحصل كل يوم الف مره .. وفتره ..وبتعدى .. والمخ دايما بيفكر فى الجديد .. الا لو احنا قولناله افتح القديم ..

ثانيا وانا هابتدى من اخر كلامك .. كان لازم تعرفوا .. بعد ما قررتوا الانفصال مرتين قبل كده .. ان فى خلل فى العلاقه .. وتبتدوا تسدوه .. تمسحوه ..

ثالثا بقه بلنسبة لموضوع الشك .. الشك اخبث سلاح فى ايد الشيطان .. ودى غلطتك .. كان لازم تقتله يوم ما اتخلق بينكوا .. لازم تبقى فاهم كل حاجه بتحصل .. لازم كل حاجه تبقى مكشوفه قدام عينيك .. البنى ادام اللى بيشك .. بتفضل افكاره مشوشه .. وبيفكر فى ميت اتجاه .. وبيخلى الانسان المشكوك فيه عنده احساس بالترقب .. خايف يعمل الحاجه دى عشان الناس ما تشكش فيه .. يبتدى يفكر فى بدايل .. تطلع البدايل غير منطقيه .. فيتاكد الشك فيه ...
تشك فى ايه .. انتوا بتحبوا بعض .. مش مجبرين انكوا تختاروا بعض

وده حله بسيط .. كل واحد فيكوا ليه خطوط حمرا .. يقولها للتانى .. والتانى عليه انه يسيب بينه وبينها .. مساحه .. عشان يوم ما يغلط .. يبقى فى مساحة امان

رابعا .. مش هاقدر اطلب منك انك تسامح خصوصا فى خيانه .. لكن .. عاوز اقولك .. كلنا بنغلط .. وكلنا لازم نسامح .. على الاقل عشان لما احنا نغلط يبقى لينا حق انهم يسامحونا ..ودى لازم انت اللى تاخد قرار فيها .. قرار عقلانى .. وانت اكيد عارف ان ربنا سبحانه وتعالى بيغفر الذنوب

بالنسبه لانك تساعدها فى مشكلتها .. فانا شايف انك مش محتاج تفكر فى حلول لمشكلتها .. قد ما انت المفروض تكون جمبها .. ولو من بعيد .. بس هى لازم تكون عارفه انك لسه جمبها .. حتى لو هى رفضت مساعدتك دى لازم تتصرف

بالنسبة لانكوا ترجعوا لبعض او لا ... فى حاجتين مهمين لازم نفرق بينهم .. العقل والعاطفه ..
غالبا عقلك بيرفض .. قلبك بيوافق .. قليلا او نادرا .. لما عقلق يوافق وقلبك يرفض .. انتوا بتحبوا بعض .. يبقى القلب موافق ... لكن مش متوافقين مع بعض ومش عاوزين تكملوا .. ده عقل غير مقتنع .. وهنا انتوا فى مأزق كبير ..

يا اما تمشوا كلام العقل .. ويفضل انكسار عاطفى .. هايسبب الم نفسى لفتره من الزمن .. حسب عوامل الزمن والاجواء المحيطه .. يا اما تمشوا كلام القلب .. وده هايعمل صداع رهيب .. وصراعات مستمره .. قد تؤدى الى زوال العاطفة ..
يا اما ................. واحد فيكوا يكون عنده نضوج فكرى .. ويقرر انه يتغير بالدرجه اى تخلى التانى مقتنع بيه تماما .. متمزج منه يعنى .. هنا هاتقدروا تحققوا المعادله الصعبه .. وحط تحت المعادله الصعبه ميت خط ..
ممكن تبان انها مش معادله صعبه ولا حاجه .. ما هو احنا يا اما بنتغير عشان اسلوب شغل .. عشان تطور مجتمع .. لكن فى الواقع هى صعبه فعلا .. واللى بيعملها بيبقى بطل

لازم تبقى عارف ان كل واحد مننا ليه طاقه ..طاقه فى التسامح .. طاقه فى الحب .. طاقه فى القدره على اتخاذ القرار السليم .. طاقه فى القدره على التغيير.. طاقه فى استيعاب القرارات نفسها وتنفيذها... الطاقه دى على قده هو وبس.. ومن الظلم انك تحاسب انسان على قد طاقتك انت ..


فى النهايه .. انا مش عارف اقولك كمل و تسامح ولا لا .. مش عارف اقولك ساعدها ازاى .. لكن هاقولك حاجه

ساعات بيبقى فى قرارات مؤلمه .. لكن هاتريحنا العمر كله ..
وساعات بيبقى فى قرارات مريحه .. وبناخدها نتيجه لكسل فى التغيير .. او لعدم القدره فى المحاوله مره اخرى .. وبنندم عليها العمر كله .. ودى برضو معادله صعبه .. ولازم تبقى قدها

حاولوا تفتكروا ايامكو الحلوه اللى قضيتوها مع بعض .. المواقف .. ضحككوا .. حكاويكوا ..

فترة صمت رهيبه .. وبعديها قام .. وقالى .. مش مهم نرجع ولا ما نرجعش .. المهم انى ابقى مطمن عليها

يا نهار ابيض يا دوبك الحق صلاة الفجر .. حسابك كام يا معلم